جرحك.........شلون اضمده؟؟

جرحك.........شلون اضمده؟؟

--------------------------------------------------------------------------------

بعد ماجيب جرحي تروفه اليه ردود انا استجمعت حيلي وبالصبر رفته

امر وتشوفني شلونه الوكت وياي مامهموم واضحك والحزن عفته
ماخليتلك خيط امل تترجاه كفظ حتى الخيال من الجفن شلته

وضعف روحي بدي جريته امثل بي كدام اليضدك لللصلب كدته
من تشوفني تعرفني لا والله موذاك الغشيم المنكبل شفته

كبالك غير واحد بي شبه من ذاك مايشبه هذاك البي جرح عفته
مره تجربه المريت بيها وياك مره وعلمتني وحنظلك ضكته

ولو خسران بس الله اليعوض الراح حب راح بعشرتك وانتهى بوكته
عفتك دونما تسمعلي وقع اقدام ماتحجي الشموع وينطفن سكته

عرض كدامي ضلي وعطلت ممشاي حاجيته ونصحته ومن رفض دسته
وضل حلمك بعيني على الجفن مطروح جذاب اليكلك من رحت جسته

ولان ماردت منك شي يضل تذكار ماردته بحياتي وعالخك سمته
منو الياخذ حلم من يطي زايد بي حلم كلش جديد وماستعملته

ابيعه لغير واحد مثل ما سويت وياي وحنينك للغرب بعته
مثل سجينتك راح انسحب بهداي حتى اترك حياتك واطلع بسكته

بلاماتشعر وي**ر قراري الشوك وارجعلك واكول تسرعت خذته
ردت ينباك جرحي ورصعت بي ماس ردت الوي الحرامي ومن رفض لمته

انا الطير النزل للطعم من حطيت روحك للضحيه ومن نزل صبته
ترك لجلك سمه وراويته المجازات من كصيت جنحه وللقفص جبته

عفتني ويه الجكاره اثنينه مورثين محد طفه الاخر وانطفيت انته
كبل جم مره اجيلك مشتري ومابيع واسمع صوت روحي تكلي عاذرته

وانكتلك اسراري بحضن لحظه شوك بس تالي الكه سري الناس سامعته
جنت مثل الهوى موتي بصفنتي يصير يحييني اليكلي الشادهك شفته

واحلف كارهك واكتشف يطلع شوك من ضمن السوالف بالحجي الكلته
ردت جم مره اطلعك كلبي مابي باب دورته على كيفي وكل كتر درته

وتعلمت كلشي في سبيل انساك بس فراك وجهك ماتعلمته
هسه بسد خريفك حطبت ذكراك خاف يرد خضارك وانتشي بجيته

بعد ماريدك تضل خيط اجلب بي وابقى متاني جفك يفزع يعته
تعوف الدفن حبك مثل سر بالراس تركض عاليحطك راس سالفته

يالمهدور حبك مني كون تشيل لاتفتر بروحي وثاري ماخذته
انا من اوميتلك مو من الم طعنات لابس ردت اكلك كلبي مالحته

ماينخدع كلبي بدمعتين رخاص تتلطخ بدمه وتقره فاتحته
عالي الجف اذا وكت الزعل ينباس ع** الجف هذاك البصلح بسته

--_--_--_--_--_--_--_--_--_--_--_--_--_--_--_--_--_--_--_--_--_--_--_--_--_--_--_