لا تكلي أرجع
--------------------------------------------------------------------------------
لا تكلي ارجـع بعـد لو ردت اروح
المـاي مايـرجع عكس مجرى النهر
وآنه نبعي الفـاض غـركَـ مشتهاي
وروحي شبعت موت وانتخمت قهر
كـد نشوتـك بيه مستشري العذاب
وكَـد نعاس عيونك اعيـاني السهر
عمر ومتـانيك نسمه وشـح هـواك
بـوكت جـانت ساعته تعادل دهر
ما اجيت وروحـي مختنكَه بـرجـاك
ومن كثر شهكَاتي احس ضلعي انصهر
هـلال حسبتك تهـل ومتـاني عيـد
ومن وصلي العيـد ضميت الشهـر
صح الك ضلن حجي وشوك او وعود
وهـم الك ذكرى ودمع بيه شكثر
لاكـن المـاضل بعـد آنه المشيت
ومـا ارد لـو في يميني تحـط كَمر
مـو غـرور تضن اعـوفك آنـه لا
لاكـن الخـافي اتضح والحق ضهر
لاتـكـلي من الندم عضيت اديـك
ابهامك اتبره ونده بوجهك كـفـر
جنت اضن فردوس حسبالي انته هيج
ماشفت فردوس بس شفتك سَـقر
بالله شنسالك جرح طعنه وتهـون؟
وانته غـدرك فـاق ادراك البـشر
سيفك البـايج تحـده بجرحي ليش؟
وصـار دلالي لرمـاحك مستقـر
كراب لسيوفك صرت مغروسه دوم
والغمد كلبي صِده وخـرلك وذر
سهامك تطوف وتصلي اعله الجروح
بحضرة جروحي السهم مايُـغتفـر
ماتت الضحكه على فراش السنون
وخضّر الموت بثناياي وكبــر
صح الك بصمات ضلن بالجفوف
بس مخالب شفت الك طبعن اثر
وانه اكَلب بالصور شفتك وراي
نيابك مكشره شفتهن بالصـور
لاتضن شوكي يردني وليك اعود
هاي تجرالك اذا نده الصخــر
الكاع تحتاج المطر يسكيها مـاي
وآنه غيمه وطلكت زخ المطـر
خل اروح وخلني ساكن خاف اثور
ومن اثـور اعصار ينذر بالخطر
وانته عـود بهيمه ساكن مـاتعيش
تنقلع بأول هبوبي مـن الـجـذر
آنه محـراب وصليب وانته سيف
نشوف ياهو اليغلب وياهو الخسر
الجمعة أكتوبر 08, 2010 9:26 pm
